НҰР-СҰЛТАН, 2019 жылғы 15 тамыз – ҚР Сыртқы істер министрінің орынбасары Ермек Көшербаев, «Kazakh Invest» ҰК» АҚ-ның төрағасы Бауыржан Сартбаев қала әкімінің орынбасары Мәліка Бектұровамен жұмыс кездесу өткізді.

Кездесу барысында Қазақстан-Қытай инвестициялық жобалары, сондай-ақ іске асырылған, іске асырылып жатқан және перспективалы жобалардың қазіргі жай-күйі талқыланды. Инвесторларды сүйемелдеу бойынша жүйелі мәселелерге, инвесторлар үшін «бір терезе» ұйымдастыру бойынша жұмыс барысына және Нұр-Сұлтан қаласына инвестиция тарту кезіндегі өзара іс-қимыл тәртібіне ерекше назар аударылды.

СІМ басшысының орынбасары атап өткендей, бүгінде Қазақстанға инвесторларды әкелу жеткіліксіз, бизнесменді жобаның басынан бастап толық іске асырылғанға дейін, сондай-ақ инвестициялаудан кейінгі кезеңде ілеспе жұмыс жүргізу де маңызды.

Инвесторлармен барлық мәселелер бойынша тікелей жұмысты, оларды «бір терезе» қағидаты бойынша инвестициялық жобаларды тартуды және сүйемелдеуді «Kazakh Invest» ҰК» АҚ және «Astana Invest» қалалық инвестицияларды дамыту орталығы жүзеге асырады.

М. Бектұрова инвестиция тартудың негізгі құралдарының бірі «Астана – жаңа қала» және «Астана-Технополис» арнайы экономикалық аймақтары болып табылатынын атап өтті. Олар инвестициялар ағынын ынталандыру құралы ретінде әлемде қолданылатын «еркін экономикалық аймақтар» тетігі бойынша қызмет етеді.

Бүгінгі таңда «Kazakh Invest» компаниясы жалпы сомасы 4,3 млрд. АҚШ доллар құрайтын 9 инвестициялық жобаны пысықтауда. 3 жоба бойынша құрылыс-монтаж жұмыстары басталды, 2 жоба іске асыру үстінде, тағы 4 жоба пысықталуда.

Мұндай кездесулер тұрақты негізде өтіп, өзекті инвестициялық мәселелерді талқылау алаңы болып табылатынын атап өтеміз.